قصتي مع العجوز !!!!

** قصتي مع العجوز **
بسم الله الرحمن الرحيم
قصتي صارت علي قبل سنة أيام الربيع
وكانوا الشباب يطلعون البر ويخيمون واتفقت أنا وخمسة من خوياي العاطلين عن العمل نطلع البر أجازة الخميس والجمعة قلنا ما حنا مبعدين عن الرياض واتفقنا نخيم برماح عند غيلانة الجو مناسب واتفقنا على القطة يعني الفلوس وكل واحد عليه أغراض أنا كان علي العزبة والماطور ومحمد عليه الخيام وخالد عليه الحطب والماء وعادل عليه السيارة
وخوياي الباقين ضيوف شرف وكنا في يوم الأحد وكل واحد يجهز أغراضه ويفضي نفسه للطلعة ...ما أطول عليكم
دق علي حمد الثلاثاء قال أنا أبروح معك على السيارة قلت تم خلك على الباب بعد الفجر .....
جاء الأربعاء قمت بدري قبل الصلاة ورحت أصلي وجيت وشغلت السيارة وتفقدت أغراضي وأخذت جوالي ومشيت لبيت حمد
اتصلت عليه مرة ومرتين وثلاث ما رد على الجوال وبعد ما وفقت عند بيته اتصل ويتعذر مني ومن خوياي يقول أن أمه تعبانه
قلت سلامات وما تشوف شر سكرت السماعة ومسكت خط الدمام مريت المحطة وعبيت بنزين 91 ومشيت الضوء طلع وأنا مشغل محمد عبده الأماكن وطربان وأنا ماشي أشوف زول عجوز معها بنتها يوم أشوفها 17 سنة ومعهم كرتون وشنطة سفر
أشرت لي على الخط استغربت منين طلعت الخط فاضي وما فيه بيوت على الخط وقفت لوجه الله في خفت في البداية
لكن قلت الله يستر قالت البنت وصوتها يجنن ممكن توصلنا رماح قلت أنا رايح رماح اركبوا وكان معي ددسن موديل 2003
نزلت من السيارة وشلت الشنطة حيطتها بالحوض وقربت عند الكرتون له رائحة كريهة ومخيسة تطيح الطير من السماء
شلته وحطيته بالحوض بجنب الماطور وركبت ومشينا وكنت مستغرب من الكرتون وش الرائحة اللي فيه قلت يا خاله كيف جيتم على الخط قالت اللموزين نزلنا بعد ما عرف إن ما معنا فلوس قلت لا عادي أوصلكم ببلاش قالت الله يجزاك خيرا ومشينا وكنت مطفي المسجل قالت البنت ممكن طلب قلت اطلبي قالت أطربنا قلت خلاص وشغلت المسجل وكان باقي على رماح 90 كيلو لقيت محطة مهجورة قالت بالله يا وليدي وقف عند المحطة أبي اكلم وقفت نزل العجوز ودخلت دورة المياه الله يكرمكم ويكرم السامعين البنت ما نزلت وبعد شوي قلت لها أمك تأخرت قالت دقيقة ونزلت البنت ودخلت وجلست انتظرهم ما احد جاء نزلت أبي أشوف وينهم فيه ووقفت عند الباب ما فيه احد ودخلت وأدور ما لقيت احد تعوذت من إبليس وقبل لأمشي قلت أبي أشوف وش اللي بالكرتون قربت من عنده وسديت خشمي وفتحته ولقيت جثة رجال خفت وسكرت الكرتون وركبت السيارة ومشيت وأسرعت وابتعدت عن المحطة فكرت إني أوقف بجنب الطريق وانزل الكرتون قبل ما أوقف شفت سيارة وراي وقفت عندي سيارة فورد موديل 2005 اللون اسود فيها ثلاث رياجيل
قال واحد منهم مساعدة قلت مشكور وما تقصر نزل الراكب الأيمن
وراح عند حوض السيارة وشاف الكرتون وشم الرائحة وفتح الكرتون حاولت أني اعلمه وش السالفة وأن اركبت معي عجوز وبنتها لكن أذن من طين وأذن من عجين فتح الباب على أخوياه وعلمهم اللي بالحوض أنا استغليت الفرصة وركبت سيارتي ومشيت وهم وراي أسرعـت لكـن مـوترهم أسرع طلعوا هـم مـن الـمباحـث وبـلـغوا
امن الطرق يوم شفت الوضع كذا قلت خربانة خربانة ونزلت صحراء مشيت موتري طلع بالبر والفورد وقف وأنا امشي حتى ابتعد عن الشارع وكان الوقت حوالي 11 صباحا ووقفت ونزلت الشنطة والكرتون أنا أبي الفكه وأنا امشي بالصحراء حتى خلص بنزين سيارتي قلت وش الحظ هذا نزلت وكان الساعة 5 مساء وأنا اركض تعبت وفجأة حل الظلام خفت خوف شديد كاد قلبي أن يقع من شدة الخوف وكنت عطشان وأبي ماء حتى طلعت ما ذاك الطعس
ويا للمفاجأة لقيت بيت شعر ركضت حتى وصلت عندهم دخلت لقيت رجال حوالي 10 سلمت عليهم وأنا في اشد العطش طلبت منهم الماء فأعطوني ماء فشربت حتى شبعت فقالوا وش فيك وعلمتهم قصتي فغضبوا فعرفت أنا القتيل قريب لهم فمسكوني فربطوني بعمود الخيمة
فحاولت أن أعلمهم القصة فقالوا أنت كذاب أنت قاتل ولد عمنا فعرفت أن الموت قريب واخذ واحد منهم خيزرانة فاخذ يضربني ويضرب قالوا كيف تريد طريقة قتلك تريد شنق مثل صدام وإلا بالرصاص وإلا احرق بالنار فقلت يا ناس الله يرحم والديكم لكن استسلمت للموت فقرر زعيمهم أني يحرقني بالنار فحفروا حفرة كبيرة فحطوني فيها وكنت مربوط فحطوني فيها وسكبوا عليك بنزين فما علمت فيه أن الوالدة تقول قم للصلاة وترش علي من الماء فقلت الحمد لله أنها حلم !!!!!!


أتمنى أن القصة أعجبتكم مع تحياتي